الأخبارميديا

خاص “محكمة”: ثلاث قصائد للمحامي فيصل الحسيني

المحامي فيصل الحسيني:
دخلك يا ليل
يا ليل خرطش كحلك عا دروب شعرها
وخلي سراجك فوق جفونها غمزات
تكيوا كمام الورد عا زخّات عطرها
وصاروا عيونها بحر يلقوط النجمات
دخلك يا ليل خدني عا مينا بحرها
شلحني متل غريب مضيع الكلمات
***
بعتني موجات
بيفلت الضو كلما جفنك فتح للصبح شباكو
وعا دهب الوراق يمشي تا يخبر حكايات
مدري عا كتف الريح لقح عطر ورداتو
مدري من خدودك هب الهوا نسمات
يا بحر البعيونها تخبيت شلحني عالرمش كحلاتو
وكلما عا كفك وقعت الشمس بعتني لعندها موجات
***
تشرين شو جابك؟
من كبوة العمر بتلملم وراقك وبتجي
بتلون المطارح وبتشختر حكايات
بتجرجر كمامك عا هداب الشجر الملتحي
وفوق الغصون بتترك الشالات
تشرين شو جابك عا البال تا تتكي
وتجمع دهب الكروم مسويات
خدنا بمشوارك تعبنا الطريق وصرنا الشتي
زخينا الحكي تا ختيروا الكلمات
(نشر في النسخة الورقية من مجلة محكمة – العدد 35- تشرين الثاني 2018)

مقالات ذات صلة

زر الذهاب إلى الأعلى
error: Content is protected !!